Monseigneur, l’estat general de la despence que sa majesté entend estre faicte pour

lextraordinaire de Piedmont durant ceste presente année m’a esté baillé le jour d’hier, auquel

le paiement de cinquante chevaulx legiers estans sous la charge du cappitaine

Jules Centurion, votre estat, et celluy de monsieur d’Evènes votre frere sont

comprins, dont sadite majesté veult le paiement estre faict durant cestedite année pour

dix mois de xxxv jours chacun, revenans à l’année entière. Presentement je vous

en envoye deux mois, commençans le premier jour de janvier et finissans le

dixiesme jour de ce present mois de mars, que jay avancé de mes deniers, en ensuivant

le contract de ce passé, et l’extraict dudit estat general, signé de ma main, que

vous monstrera Froment, qui est près de vous ; lequel je continue en ma charge

pour le rapport que lon m’a faict quil vous est agreable. Je mettray peine,

monseigneur, si lon me tient parolle de ce qui m’a esté promis, que vous

serez doresnavant satisfaict pour le regard de ce que dessus de telle sorte que

vous en aurez contentement.

Monseigneur, je prie Notre Seigneur vous donner en santé heureuse et longue

Vye. De Paris, ce xiiie jour de mars 1574

Votre très humble et très obeissant serviteur

Zacarie Gaudart

Consultation